هل تحب حواديت الحيوانات التي فيها مغامرة وعبرة حلوة في النهاية؟ تعالى نسمع سوا قصة العصفور والفيل، ونشوف إزاي الذكاء والتصرف الحلو أقوى من الشكل والمظاهر، خصوصا لما يدخل الثعلب المكار في اللعبة.
تعالوا نكتشف مع بعض واحدة من سلسلة قصص اطفال قبل النوم مكتوبة بالعامية المصرية، وهي تحكي عن فيل طيب وعصفور صغير وقع من عشه.
 |
| حدوتة للأطفال بالمصري قبل النوم الفيل والعصفور |
حدوتة للأطفال بالمصري: الفيل والعصفور
كان يا ما كان في عصفور صغير عايش مع أمه فوق الشجرة. وفي يوم من الأيام، راحت الأم عشان تجيب له أكل. العصفور ما كانش لسه كبر أو اتعلم الطيران، فقرر يعمل زي أمه. قفز من الشجرة ورفرف بجناحه لحد ما وصل على الأرض.
سمع العصفور صوت فيل كبير بيضرب الأرض، فخاف العصفور واستخبى منه. لكن الفيل الطيب شاف العصفور وسأله: إيه اللي جابك على الأرض؟ أنت شكلك وقعت من فوق الشجرة. ما تخفش يا حبيبي.
وراح الفيل الطيب جاب له شوية ورق وحطهم حواليه عشان يدفيه من البرد.
مكر الثعلب وخداع العصفور
الثعلب المكار شاف كل حاجة واستغل انشغال الفيل بالبحث عن الأوراق. راح الثعلب للعصفور وسأله: هو أنت بتعمل إيه هنا؟
قال العصفور: كنت بحاول أطير من العش، وفجأة لقيت نفسي وقعت منه.
قال الثعلب بمكر: أنا عارف مكان عشك وكمان أمك، وممكن أرجعك هناك. بس بشرط لازم تتخلص من الفيل الشرير ده، لأنه عاوز ياكلك.
لما جاء الفيل عند العصفور وجاب له ورق كتير عشان يدفيه، راح العصفور قال له: أنا جعان، ممكن تجيب لي أكل يا عمو الفيل؟
قال الفيل: ماشي يا حبوب. بس أوعى تروح مع حد أي مكان، علشان في مخلوقات شريرة أوي هنا في الغابة.
كيف أنقذ الفيل العصفور؟
الثعلب كان بيراقب الفيل من ورا الشجر. وبعد ما اتأكد إنه مشى، راح للعصفور الصغير وقال له: يلا بينا.
مشى العصفور مع الثعلب شوية. فجأة، ملامح وش الثعلب اتغيرت وبين أنيابه للعصفور.
العصفور أول ما شاف وش الثعلب الحقيقي اتخض وفضل يصرخ: الحقوني يا عمو الفيل!
فلما سمع الفيل الطيب صوت الصراخ، راح بسرعة عند الثعلب وضربه وأنقذ العصفور الصغير المسكين.
لما سأله الفيل: ليه ما سمعتش كلامي؟
رد عليه العصفور: أنا الصراحة كنت خايف منك لأن شكلك كبير قوي. أما الثعلب كان شكله صغير وحلو شوية عنك.
ضحك الفيل شوية وقال للعصفور: هو المكار ده كمان لحق يضحك عليك؟ أنا كنت بس ناوي أساعدك. بس من هنا ورايح لازم تتعلم إنك ما تحكمش على حد من شكله أو حجمه، لكن تحكم عليه من أفعاله بس.
أخذ الفيل الطيب العصفور الصغير لأمه، كانت قلقة أوي وبتدور عليه في الغابة كلها. شكرت الأم الفيل، ورجع العصفور الصغير لعشه.
ما نتعلمه من قصة العصفور والفيل
لا تحكم على الناس من شكلهم، بل من تصرفاتهم. زي ما شوفنا في قصة العصفور والفيل، الفيل الطيب أنقذ العصفور رغم شكله الكبير، والثعلب خدعه رغم إنه كان باين عليه لطيف. اتعلمنا إن النية والسلوك هما اللي يفرقوا، مش الشكل أو الحجم.
لو عجبتك الحكاية، تابع معانا باقي قصص أطفال قبل النوم مكتوبة بالعامية. هتلاقي كل يوم حكاية جديدة ومفيدة.
