بدور عن قصص اطفال مكتوبة قصيرة مضحكة عشان تقراها لطفلك قبل ما ينام، النهارده جبنالك مجموعة حواديت زينه قوي، مكتوبه بصيغه صعيديه أصيله، وتعال حاسبني لو ما ضحكتش عليها من قبلك.
يعني تعلوب ساب الوطن العربي؟ كله وراح يشغل مخه في الصعيد، تعالوا نشوفوا حصل إيه معاه ولد الثعلوب ديتي.
قصة تعلوب والديك العتاقي
كان يا ما كان، في بلاد الصعيد الجواني عاش ديك عتاقي تخين، كان بيدن كل يوم الفجر يصحي صاحبه، ومره صاحبه نام متأخر، الديك راحله عند الشباك يصحيه كوكو رما عليه المنبه ودعا عليه.
المهم، كنه ربنا استجاب لدعوة صاحبه، وفي اليوم داتي كان الثعلب تعلوب ماشي بيتعارك مع بطنه: "اسكتي يا واكله ناسك اهيني بدور على حاجه اكلها".
رفع تعلوب راسه على فرع شجره وقال: "واه، مبروك يا بطني هتاكلي فروج بلدي! بس لازم أضحك عليه عشان ما اتفضحش".
راح تعلوب عند الديك وقله: "السلام عليكم يا مولانا أبو الريش، البيصحينا على صلاة الفجر، اباي لو ما كنتش هنا كنا هنعيش كيف".
قاله الديك: "كاك. وعليكم السلام ورحمة الله وبركاته قول وإفتي يا اخبث ما راتهم عيني".
قال الثعلب بتوب الجماعه الكدابين: "ملك الغابه أصدر أمر ملكي، كل الحيوانات خوات وما حدش ياكل التاني، تعالي يا ابو عموو اخدك بالحضن واحب على راسك كمان".
قاله الديك: "تصدق يا تعلوب أول مره تقول حديت زين، بص هناك شايف كلب صيد جاي بسرعه كنه عاوز يحضنك ويحب على راسك كمان".
تعلوب اتلخبط وقعد يبص يمين وشمال من كتر الخوف قال: "خلاص يا ابو الريش نأجلوا الحضن بعدين لما اقبلك المره الجايه سلاموا عليكم!".
الديك قله: "استنى يا ابو الحصين الكلب قرب يوصل اهو جيه خود يا واد".
قاله التعلب وهو بيجري: "واه يا واكل ناسك عاوزه ياكلني!".
رد عليه الديك: "امال أنت عوزني أنزلك وتكلني يا خبيث".
ما اخبرش تعلوب سمع حديت الديك ولا لاء، الأعرفه أن عشره ما يجيبوا رجله، وقال يا فكيك وهرب.
حدوتة الثعلب المكار والماعز الطماعة
في يوم حار في بلدي الحبيب الصعيد الجواني، كان تعلوب المكار ماشي في الصحرا مدلدل عنقه من العطش، بص للشمس وقلها: "خبر ايه يا وكلاهم ما وركيش غيري امال، يا بوي عطشان يا واد لو شوية ميه ابل بيهم حنجرتي".
مشى تعلوب شويه لحد ما ربنا كرمه ولقي بير ميه، من طفاسته نط فيه، حيوان متسرع.
المهم، بعد ما ملى كرشته الراجل بص لفوق لقي نفسه محبوس، فقال: "يا بوي يا مرارك يا تعلوب! هيورثوا من وراك يا وكلهم، هيقولوا الله يقيده مات غرقان، راح مالك لولد الرفضي يا ابو الحصين".
سمع صوت بكية أبو الحصين عنزه عطشانه، المهم راح يشوف خبر ايه، قال الجدي: "يا بوي، الحمد لله اخيرا لقيت بير ميه".
ابو الحصين من مكر دمه قال: "تعال انزل تحت عشان تاخد بركة سيدك الغرقان".
قاله الجدي: "استنى اروح اجيب جردل واجي اشرب".
قله الثعلب: "لا يا ابو قرون مخوخه، كده البركه هتروح من البير بسبب قرونك اكتر ما هي رايحه بسبب لونك الاسود الغطيس، انت شايف حد عندك حاطط جردل ولا قُله، اه!".
الجدي ما كدبش خبر، وقام ناطط حتت نطة خلت تعلوب يضمن الورث بتاعه، راح بسرعه الثعلب راكب على ضهره واشعبط في قرونه، وطلع من البير.
راح قال: "الحمد لله ما حدش هياخد ورثي! بس ورث إيه؟ لو عندي ورث كنت جيت في البير".
الجدي الغبي قله: "طلعني يا تعلوب يا ولد عمي عشان خدت اليكفيني من البركه".
قاله ابو الحصين: "خليك عندك لما ياجي حد تاني يطلعك! عشان البركه تقعد ثابته في البير ما تتحركش واصل. هاهاها".
قصة ثعلوب والحمامه الطيبه
في يوم من ذات الأيام، كان تعلوب المكار بيدور على حاجه ياكلها، ومن شدة الجوع ربط بطنه: "لو ما سكتي يا بطني لهربطك بسلسله حديد!".
فلمح حمامه فوق شجرة النخل: "أباي، حمامه زينه فوق الشجره تلقيها معاها شوية فراخ".
راح تعلوب تحت الشجره: "بقلك يا بت يا حمامه! إرمي عيالك وإلا طلعت وكلتك معاهم".
الحمامه: "أمانه يا تعلوب بعد عن عيالي!"
قلها تعلوب: "إسمعيني زين بلا كتر حديت هترميهم ولا أطلع لك النخله".
راحت الحمامه الطيبه رمتله الفراخ وكلهم، وفي المره التانيه رحلها وخاد فراخها تاني. فضلت الحمامه تبكي وتنوح، راح جي مالك الحزين وسألها: "خبر إيه يا حمامه مالك أمال؟"
ردت الحمامه: "تعلوب المكار عينه على عشي كل ما يعرف أن عندي فراخ ياجي يقولي ارميهم وإلا أطلع أكلك معاهم".
قلها مالك الحزين: "قليله إطلع لو عملها طيري أنت بجناحينك وسبيله العش".
المره التالته، راح التعلب عند الحمامه: "مش عاوز اضيع وقت معاكي اخلصي ارمي عيالك".
الحمامه: "اطلع خدهم لو كنت سبع".
تعلوب: "كيف عرفتي يا واكله المجموعه أني مش هقدر أطلع".
قالت الحمامه:"البركه في مالك الحزين ربنا يقلل حزنه".
قال الثعلب: "يقلل حزنه! ده أنا هخليه يحزن العمر كله".
راح الثعلب وفضل يدور على مكان مالك الحزين، لحد ما لقيه عند الترعه، قاله: "يا مالك الحزين، لو جالك الريح من الشمال هتتصرف كيف؟"
جاوبه مالك الحزين: "هدس راسي تحت جناحي اليمين".
سأله الثعلب: "طيب لو جتلك من اليمين".
جاوب مالك: "هدس راسي تحت جناحي الشمال".
الثعلب حاول يخلي التحدي أصعب: "طيب لو جتلك من كل الإتجهات".
جاوبه مالك الحزين: "هدس راسي تحت جناحيني الإتنين".
سأله الثعلب: "وريني كيف هدسهم".
وأول ما مالك الحزين حط راسه بين جناحينه هجم عليه الثعلب وقال: "قبل ما تنصح الناس دور على حد ينصحك يا أبو مخ ضلم". وبكده يكون الثعلب إتعشى ملوخيه بمالك الحزين.
